SF: 10: ທັມມະຊາດຂອງນົກ

10: ທັມມະຊາດຂອງນົກ

ທັມມະຊາດ   ຂອງນົກ   ໂບກໂບຍນິນ
ເຫີນຈາກດິນ   ບິນໄປ   ໄດ້ທຸກແຫ່ງ
ບິນໄປມາ   ຫາຮັງ   ທັງຝົນແລ້ງ
ມີປີກແຂງ    ແຂ່ງລົມ   ບໍ່ຫວັ່ນໄຫວ

ເຮົາບໍ່ມີ    ບີກບິນ   ສູ່ອາກາດ
ບໍ່ສາມາດ   ເຫາະເຫີນ   ເວີ່ນໄປໃສ
ມີພຽງປີກ    ນ້ອຍໆ    ຕິດຫົວໃຈ
ຄ່ອຍບິນໄປ    ຫາເຈົ້າ    ທຸກເຊົ້າແລງ....

ໃຈຄົນ

ໂອສາຍນໍ້າ ທີ່ສົດໃສ ໄຫລລ່ອງເລີຍ
ແຕ່ບໍ່ເຄີຍ ຈະສົດໃສ ເໝືອນໃຈຄົນ
ໂອສາຍນໍ້າ ທີ່ຄົດລ້ຽວ ກ້ຽວວຽນວົນ
ແຕ່ໃຈຄົນ ຍິ່ງຄົດລ້ຽວ ບິດບ້ຽວກ່ວາ...

ອັນສາຍນໍ້າ ທີ່ວ່າເລິກ ເລິກເຫລືອຫລາຍ
ບໍ່ສູ້ໃຈ ຂອງມະນຸດ ສຸດເລິກກວ່າ
ອັນສາຍນໍ້າ ຍາມມີຕົມ ສຸດຂຸ່ນມົວ
ໃຈມະນຸດ ສຸດຂຸ່ນກວ່າ ຫລາຍພັນເທົ່າ...

ເໝືອນສາຍນໍ້າ
ເໝືອນສາຍນໍ້າ ໄຫລໄປ ບໍ່ກັບຫັນ
ທຸກຄືນວັນ ຜັນວຽນ ປ່ຽນແປງໄປ
ອັນຄວາມຮັກ ກໍເໝືອນ ເຄື່ອນນໍ້າໄຫລ
ໄຫລເລື້ອຍໄປ ບໍ່ຫວນ ກັບຄືນມາ...

ວັນນີ້ພົບ ປະສົບ ຄວາມສຸກສັນ
ຍິ້ມຊື່ນບານ ປະທານ ດ້ວຍດິນຟ້າ
ແລ້ວວັນນຶ່ງ ເຮົາຕ້ອງ ຫລັ່ງນໍ້າຕາ
ເມື່ອຮັກມາ ຫາຍໄປ ເໝືອນສາຍນໍ້າ

SF

10: ທັມມະຊາດຂອງນົກ

ນໍ້າໄຫລປ່ຽນໃຈປາ ເງິນຕຣາປ່ຽນໃຈຄົນ

ທັມມະຊາດ ທີ່ສວຍງາມ